منحة المشروعات مجانية احذر السماسرة

فيه ناس كتير في مصر بتحلم إنها تبدأ مشروع صغير أو تستفيد من منحة تساعدها تحسّن حياتها وحياة أسرتها. بس للأسف، مع وجود الفرص دي، ظهر نوع جديد من الاستغلاليين، اللي ممكن نسميهم “سماسرة المشروعات والمنح”. الناس دي بتستغل البسطاء والمحتاجين، وبتخلّيهم يصدقوا إنهم هيساعدوهم في الحصول على منحة أو بدء مشروع، بس طبعًا مش ببلاش، لازم يدفعوا “الحلاوة” أو العمولة.

السماسرة دول بيشتغلوا بحيلة ذكية، بيوعدوا الناس إنهم عندهم علاقات ومعارف تقدر توفر لهم منحة مالية أو مشروع صغير من الجهات الحكومية أو الجمعيات الخيرية. وبالفعل بيعملوا كلامهم مقنع جدًا لدرجة إن كتير من الناس بيدفعوا الفلوس من غير ما يفكروا مرتين. ولما تيجي تسألهم الفلوس دي ليه، بيردوا بكل بساطة: “دي مقابل تعبي ومجهودي، ده حقي”.

المشكلة الحقيقية بتيجي لما تكتشف الناس دي إنها اتنصب عليها. المشروع اللي كانوا مستنينه مش بيظهر، أو المنحة اللي دفعوا علشانها ما بتيجيش او غير مطابقين لشروط المنحة ، والسماسرة دول بيختفوا زي الدخان. وفيه ناس بيبقى كل اللي معاهم راح على “الحلاوة” اللي دفعوها من غير أي فايدة.

اللي بيوجع أكتر إن الاستغلاليين دول مش بيستهدفوا غير الناس الغلابة اللي مش عارفين القوانين أو مش عندهم تعليم كافي يفهمهم الطرق الرسمية للحصول على المنح والمشروعات. دول بيدوروا على اللي مش عنده حيلة أو اللي بيدور على أمل بأي تمن.

عشان كده، لازم نكون حذرين. أي حد يوعدك بمنحة أو مشروع ويطلب منك تدفع فلوس مقدم أو ياخد عمولة، لازم تسأله عن مصداقيته. المنح الحكومية أو اللي بتيجي من الجمعيات الخيرية ليها طرق رسمية واضحة، وما فيش حاجة اسمها “حلاوة” أو عمولة علشان تاخد حقك.

فريق عمل مؤسسة مهنة ومستقبل للتنمية